Mbunge ataka wanaodaiwa elimu ya juu wakatwe moja kwa moja na mifuko ya jamii

MBUNGE wa Viti Maalum, Christowaja Mtinda (Chadema), ameitaka Serikali kutunga sheria itakayoilazimisha mifuko ya hifadhi za jamii, kuwakata moja kwa moja wanachama wake wanaodaiwa na Bodi ya Mikopo ya Elimu ya Juu.

 Akiuliza swali la nyongeza bungeni jana, Mtinda alisema kwa sasa mifuko huyo haitaki kuwakata wadaiwa hao kwa kuwa sheria zilioanzisha mifuko hiyo haziruhusu kuwakata moja kwa moja.

 “Kwa nini sasa Serikali isilete muswada wa sheria ya kuilazimisha mifuko hiyo kushirikana na Bodi ya Mikopo ya Elimu ya Juu kuwakata wanachama wanaodaiwa na bodi hiyo ili mikopo hiyo iweze kurudishwa kwa wakati?” alihoji.

Akijibu swali hilo, Waziri wa Elimu na Mafunzo ya Ufundi, Dk. Shukuru Kawambwa alisema  kwa sasa Bodi ya Mikopo huipatia mifuko hiyo majina ya wadaiwa sugu.

 “Hata hivyo Serikali ipo katika mchakato wa kuandaa muswada wa sheria kuhusiana na masuala hayo,” alisema.

Awali akijibu swali la Mbunge wa Viti Maalum, Catherine Magige (CCM), Dk. Kawambwa alisema jumla ya mikopo yenye thamani ya  Sh. trioni 1.8 kwa wanufaika 2191,582 katika kipindi cha mwaka 1994/95 hadi 2013/14.

“Hadi Aprili 30, mwaka huu mikopo ya Sh. bilioni 70.83 ilikuwa imerejeshwa kutoka kwa wanufaika 136,803 kati ya wanufaika 177,017 ambao mikopo yao imeiva.

 “Wanafunzi 40,819 ambao hawajaanza kurejesha mikopo, Bodi imeanza kuwachukulia hatua mbalimbali ili wawezse kurejesha,” alisema.

Alisema hatua hizo ni pamoja na majina yao kutangazwa kwenye vyombo vya habari, baadhi wameanza kushitakiwa mahakamni, kuzuiwa kupata udhamini katika masomo ya elimu ya juu ndani na nje ya nchi na waajiri wa wanufaika wa mikopo hiyo wameanza kushitakiwa mahakamani.

 “Mei 21 mwaka 2013, Bodi iliwafungulia kesi mahakamani wadaiwa 18 wasiolipa mikopo yao katika Mahakama ya Hakimu Mkazi Kisutu.

“Kati ya hao, wadaiwa watano waliamuliwa kulipa madeni yao pamoja na faini wakati wengine 13 kesi zao zinaendelea kusikilizwa,” alisema.

Aidha, Dk. Kawambwa alisema Bodi ilifungua kesi kwa waajiri watatu waliokaidi kutoa taarifa dhidi ya watumishi wao wanaodaiwa.

Katika swali lake Magige alitaka kujua idadi ya wanafunzi walionufaika na mikopo, idadi ya waliorejesha na hatua zilizochokuliwa kwa waliogoma kurejesha.