Umoja wa Ulaya Wataka Uchaguzi wa Tanzania Ufanyike Kwa Uwazi!!

BALOZI wa Umoja wa Ulaya (EU) nchini, Filiberto Sebregondi, ameshauri Uchaguzi Mkuu wa mwaka huu ufanyike kwa uwazi zaidi ili kulinda amani iliyopo nchini.

 

Akizungumza na waandishi wa habari jana jijini Dar es Salaam, Balozi Sebregondi, alisema pia ni lazima Serikali ifanye maandalizi ya kutosha na wagombea washiriki kwa amani katika kipindi chote cha kampeni.

 

“Mwaka huu ni wa muhimu kwa Tanzania kwa sababu inatarajia kupata viongozi wapya kuanzia ngazi ya rais, tunaamini ni nchi inayoheshimu Katiba kwani kiongozi akimaliza muda wake anawapisha wengine kwa mujibu wa Katiba jambo ambalo nchi nyingine zimeshindwa kufuata utaratibu huu na kuingia katika machafuko,” alisema.

 

Alisema EU imekuwa ikishirikiana kwa ukaribu na Tanzania katika masuala mbalimbali yakiwamo hayo ya uchaguzi ambapo mwaka 2010 ilisambaza waangalizi wake zaidi ya 100 ambao walisimamia ili kuangalia unafanyika kwa vigezo vya kimataifa.

 

“Baada ya uchaguzi ule tulitoa mapendekezo ambayo yalitajwa pia katika Katiba Inayopendekezwa ambayo mchakato wake umesitishwa, lakini nia yetu ni kuona uchaguzi unaendelea kuwa huru na haki,” alisema.

 

Sebregondi alitaja mapendekezo hayo kuwa ni kuwapo Tume Huru ya Uchaguzi, uhuru wa vyombo vya habari katika kupata na kusambaza taarifa za uchaguzi kwa umma na wananchi wapewe fursa ya kukata rufaa kupinga matokeo mahakamani.

 

“Hatutamani yale yaliyotokea Zanzibar mwaka 2010 yajirudie tena, na ndiyo maana bado tunaendelea kusaidia ikiwa ni pamoja na kuwezesha mafunzo kwa askari polisi juu ya namna ya kusimamia watu vizuri kwenye kipindi cha uchaguzi ili kuhakikisha uchaguzi huo unafanyika kwa amani,” alisema.

 

Naye Naibu Mwidhinishaji Mkuu wa Mfuko wa Fedha (EU) wa Wizara ya Fedha, Godlove Steven, alisema tangu mwaka 2008 hadi 2013 umoja huo umeipatia Serikali euro milioni 6.6 sawa na zaidi ya Sh trilioni moja ambazo zimetumika katika kutekeleza miradi mbalimbali ya kimaendeleo nchini.