MAUAJI:Mtoto wa Miaka 10 Auawa Kwa Kuchinjwa

JESHI la Polisi mkoani Kilimanjaro, linawasaka watu waliohusika kumuua mtoto aliyefahamika kwa jina la Eusebia Swai (10), ambaye ni mwanafunzi wa darasa la tatu, Shule ya Msingi Mtemboni, iliyopo katika Wilaya ya Rombo, mkoani humo.

Watu hao walimuua mtoto huyo kikatili kwa kumchinja shingo na kisha kuutelekeza mwili katika nyumba waliyokuwa wakiishi.

Kaimu Kamanda wa Polisi mkoani humo, Koka Moita, alithibitisha kutokea kwa tukio hilo Juni 22, mwaka huu, saa nane mchana katika Kijiji cha Allen Chini, Tarafa ya Mengwe, wilayani humo.

Alisema mtoto huyo aliuawa na watu wasiofahamika baada ya kumshambulia sehemu mbalimbali za mwili wake ambapo wazazi wake, Jerome Swai (54), Lusia Swai (50), walikuwa shambani.

"Waliporudi saa nane mchana, walimkuta mtoto wao akiwa amelala chini akitokwa na damu nyingi ndipo walipogundua amefariki dunia," alisema.

Kamanda Moita alisema jeshi hilo linaendelea na msako mkali ili kuwabaini wote waliohusika na mauaji hayo ili wachukuliwe hatua za kisheria ambapo mwili wa marehemu umehifadhiwa katika Hospitali ya Wilaya Huruma.